التخصصات الاكثر طلبا و الاغلى سعرا

Pipeline TD and Scripting

و هنا دى بتبقى شغلانه كلها برمجة و كتابة اكواد مع خلفية فى برامج الثرى دى و التو دى و طبعا يفضل الى داخل تخصص زى ده يكون عنده خلفية في البرمجة او بيحبها و هيا بردو مطلوبه ان الناس الى فى التخصصات التانية تعرف عنها ولو القليل علشان ده بيساعد فى تحسين شغلهم وتوفير وقت كتير.

طبعا الشغل الاساسي للتخصص ده هو توفير و الوقت و الجهد و تفادي الأخطاء البشرية بتحويل حاجات كتير فى الشغل انها تتعمل بشكل آلى من غير تدخل بشري او تحويل مجموعة اوامر ممكن تتعمل فى ساعات لزرار واحد و حاجات كتير من النوعية دى و ده اكبر اختلاف ما بين الاستوديوهات الى فى مصر و بره لان بره بيبقى فى فريق كامل للشغل ده و انهم يحاولو حياة الارتست من انه يضيع وقته فى حاجات متكررة لانه يحط وقته كله للإبداع و التركيز فى الصورة النهائية من غير ما يشغل نفسه بحاجة تانية.

و على حسب معرفتى بيكون محتاج مذاكرة python , Mel Script , و حاجات تانية هيتعمل بيها ارتكل بعد كده .

و هنا فى ارتكل بيتكلم عن ده

https://www.ftrack.com/en/2021/09/what-is-a-pipeline-td.html

و وجه نظرى ان الناس الى خلفيتها Game Development لو حابين يخشو مجال صناعه الافلام ممكن يخشو التخصص ده جدا.

و باقى التخصصات محتاجه تبتدى تذاكر ده بشكل مش كبير لانهم مع الوقت بيحتاجوها بشكل خفيف بس مؤثر.

Houdini Effects TD

الاعتماد الاساسي على هوديني فى تخصص الايفكتس او الي هي المؤثرات المعتمدة على الفيزياء فى حركتها زى النار و الميه و الدخان و التكسير.

و التخصص ده من اكتر التخصصات ندرة هنا وبره و طبعا بيبقى سعرا اعلى بالاخص فى الناس اصحاب الخبره فيه.

Houdini Artist

وهنا بقى موضوع مختلف عن الايفكتس زى العنوان الى فات هنا بنتكلم ان ارتست زى الى بيشتغل على مايا مثلا يبقى بيعمل كده على هودينى زى الإضاءة و الرندر و باقى التخصصات ماعدا الانيميشن حتى الان وده لان استوديوهات كتير عالميا بتنقل ان يبقى البيبلاين بتاعها على هودينى و فى مصر مش كتير بس هيبتدى يتنقل الفلو بتاع الشغل على هودينى فى المستقبل القريب و غير كده بقى فى تخصصات تانية من التخصصات الثقيلة ابتدت تتنقل على هودينى و ده هنتكلم فيه فى نقط تانية قدام ف مجرد دخولك برنامج هوديني ك ليتنج ارتست او موديلر بتشتغل بروسدجرال موديلنج مثلا حيخلى الطلب عليك اكتر و طبعا المرتب حيبقى افضل.

Character FX

و يعتبر التخصص ده جامع ما بين الجانب الايسر من المخ مع جزء كبير من الجانب الايمن فيها تكنكال مع ارت

دى الشغلانه المسؤولة عن عمل كل ماهو ديناميك يخص الشخصيات زى

Hair and Grooming الشعر و الفرو -

و يفضل فيهم الشغل ب Houdini او yeti

Muscles محاكاة العضلات -

و يفضل فيهم الشغل ب Houdini او zIva

Cloth محاكاة الملابس والأقمشة -

و يفضل فيهم الشغل ب Houdini او/و marvelous designer

ودول نعتبرهم كلهم تخصص على بعضه و نعتبر كل شغلانه منهم تخصص لوحده بردو وطبعا بردو دول من اكتر الشغلانات المطلوبة فى مصر و بره و عدد الناس الى بتشتغل هم قليل جدا

Character/Creature Animation

وهيا طبعا شغلانه التولز أو الجزء التكنيكال فيها ضئيل جدا يعنى لو انت شغال على برنامج مايا اصلا مش محتاج غير عدد ايام قليل علشان تعرف التولز بتاعت التحريك بس ده مش معناه انك بقيت انيماتور خالص فى الانيميشن معتمد على دراسة فن الحركة نفسه ودراسة طريقه حركة الإنسان و الحيوانات ك حركة و طبعا اهم حاجه فى الى بيتعلم الانيمشن انه يبقى فى حد سينيور بيتابع معاه و علشان كده انجح طريقة لدراسة الانيميشن يا ام عن طريق معاهد بتتعامل مع مدربين شغالين بايديهم فى السوق زى ITI مثلا او دراسه فى انيميشن سكول بره زى انمي سكول و غيرهم و منصحش بدخول اى كورسات زى دى غير لما تبقى قاطع شوط مع نفسك فى توتوريالات انيميشن و لما تتاكد مين اللى بيدرسها و لازم يبقى شغال فى شركة سنيور علشان يفيدك فعلا و الا حيبقى ع الفاضى.

و طبعا مشكلة الماركت كله ان فيه ناس كتير كانت شغاله انيميشن على مسلسلات كارتون الى كانت بتطلع السنين الى فاتو و للاسف الشوريل اللى بيقدموه من ناتج الاعمال دى بيبقى بعيد خالص ك كواليتى و ك ريالستك وبيبقى لا يتماشى مع المطلوب فيبقى متخيلين ان المجال ده مش مطلوب بس بالعكس هو مطلوب بس بكواليتى تانية و بالعكس الناس اللى بتشتغل بالكواليتي دى قليلين جدا.

Character/Creature Sculpture

شغل النحت بردو الجزء التكنيكال فيه مش كبير و يعتمد على الفن والموهبة اكتر كتير و الشغل الاساسي بيبقى على برنامج ZBRUSH.

اهم حاجات بيحتاجها الارتست هو دراسة التشريح و نسب الجسم والوش .

و المشكله فى المجال ده ان زى ما قولنا قبل ان علشان تبقى فيه جونيور لازم تبقى واصل لليفل محترم علشان ينفع تخش شركة و حد يساعدك للوصول لمستوى كويس و لو شغلك مش حلو حتى فرصة التدريب مش حتكون موجوده ف يحتاج مذاكره كتير و تطبيق و بيرسونال بروجكتس كتير واول ما تبتدى تطلع شغل حلو او يجي منه حتلاقي الناس هي اللي بتكلمك بمجرد ما تشير شغل ليك كويس فى اى كوميونتي زى مثلا https://www.facebook.com/groups/CGrevolution